Аҧсны Раҧхьатәи Ахада Владислав Григори-иҧа Арӡынба диижьҭеи 80-шықәса аҵра иазку Аҩбатәи Аҧсуа Азиндырра амчыбжь иалагӡаны иазгәаҭаз IV Жәларбжьаратәи аҭҵаарадырра-практикатә конференциа «Ауаажәларра напхгараҭаратә мчра ашьақәгылара, аҿиара, ҧхьаҟатәи аҧеиҧш» аусура хацнаркит.

Ауснагӡатә алагамҭазы аҭҵаарадырра-практикатә конференциа алахәылацәеи асасцәеи Владислав Григори-иҧа дыргәаладыршәеит, иаҭааит иҳаҭгәын, ашәҭшьыҵәрақәа шьҭарҵеит.

Аҭҵаарадырра-практикатә конференциа апленартә еилатәара аалыртит Аҧсны Аконституциатә ӡбарҭа ахантәаҩы Диана Ҧлиа. Уи лықәгылараҟны, лымкаала дазааҭгылеит аҧсуа ҳәынҭқарра ашьақәгылараҟны Владислав Григори-иҧа илагала. Рыӡбахә лҳәеит IV Жәларбжьаратәи аҭҵаарадырра-практикатә конференциа хадара зуа азҵаатәқәа ртәы.

Жәлар Реизара ахантәаҩы Лаша Ашәба, асасцәеи алахәылацәеи  аҭҵаарадырратә конференциа аартра рыдныҳәало, иналукааша аполитик, ҳаамҭазтәи аҧсуа ҳәынҭқарра ашьаҭаркҩы   Владислав Григори-иҧа Арӡынба аҧсуа ҳәынҭқарра ашьақәгылараҟны илагала атәы дазааҭгылеит.

Аҧсны ауаҩы изинқәа рыхьчаразы Анапынҵа ҷыда змоу Анас Кьышьмариа лықәгылараҟны иазгәалҭеит, ауаажәларра напхгараҭаратә мчра ҳаамҭа ицәырнаго ауадаҩрақәа рыӡбара алзыршо амчрахь ишаҵанакуа, уи аусура бзиа ишалнаршо аҳәынҭқарраҟны  ауаажәларра  рзинқәа рыхьчареи ҭынч рынхареи.

Апленартә еилатәараҟны иаҧхьеит А.А.Тибилов ихьӡ зху Аахыҵ-Уаҧстәалатәи аҳәынҭқарратә университет аректор Вадим Тедеев идныҳәаларатә шәҟәы. Адныҳәаларатә шәҟәаҟны иазгәаҭоуп  : « Владислав Григори-иҧа Арӡынба Аҧсны аҭоурых аҟны ишьҭамҭа аанижьит иалукааша аҧхьагыла, аҳәынҭқарратә усзуҩ, аамҭа уадаҩқәа раан  амилаҭ рзинқәа рыхьчаҩ иаҳасаб ала. Хшыҩзышьҭра ҷыда рзутәуп аҳәынҭқарратә институтқәа рышьақәгылараҟны уи  илагала».