Аҧсны Раҧхьатәи Ахада Владислав Григори-иҧа Арӡынба диижьҭеи 80-шықәса аҵра иазку Аҩбатәи Аҧсуа Азиндырра амчыбжь аҳәаақәа ирҭагӡаны имҩаҧысит IV Жәларбжьаратәи аҭҵаарадырра-практикатә конференциа «Ауаажәларра напхгараҭаратә мчра ашьақәгылара, аҿиара, ҧхьаҟатәи аҧеиҧш» .

Аҭҵаарадырра-практикатә конференциа аалыртит Аҧсны Аконституциатә ӡбарҭа ахантәаҩы Диана Ҧлиа. Уи лықәгылараҟны, дазааҭгылеит аҧсуа ҳәынҭқарра ашьақәгылараҟны Владислав Григори-иҧа илагала. Рыӡбахә лҳәеит IV Жәларбжьаратәи аҭҵаарадырра-практикатә конференциа хадара зуа азҵаатәқәа ртәы.

Аҭҵаарадырра – практикатә конференциаҟны ажәахәқәа рыманы иқәгылеит Аҧсныи Урыстәылеи аҧышәа ҳарак змоу азиндырыҩцәа, административтәи аконституциатәи  азанааҭдырыҩцәа, аҵарауаа.

Аконференциа аҩбатәи ахәҭа аҟны ажәахәқәа рыманы иқәгылеит Аҧсны азиндырра аҭҵааҩцәа  ҿарацәа, Аҧсны Аҭҵаарадырра Академиа аекономикеи азини ринститут аспирантцәа.