Аҧсны Раҧхьатәи ахада Владислав Григори-иҧа Арӡынба диижьҭеи 80-шықәса аҵра иазку II Аҧсуа Азиндырра амчыбжь аусура хацнаркит азиндырра аҿиара азҵаатәқәа ирызкыз алекциақәа рцикл  ала.

Ауснагӡатә аалыртит Аҧсны Аконституциатә ӡбарҭа ахантәаҩы Диана Ҧлиа. Уи лықәгылараҟны иазгәалҭеит, ҳаамҭазтәи аҳәынҭқарра ашьақәгылара аҟны Владислав Арӡынба иҭынха ахә шыҳараку.

Анаҩс ауснагӡатә алахәылацәа идлырдырит асасцәа, дырзааҭгылеит урҭ ззаҭгылараны иҟаз  азҵаарақәа.

Ҳаамҭаз азиндырра аҿиара азҵаатәқәа ирызкыз алекциақәа рцикл хацлыркит Адәныҟатәи ахәаахәҭразы Урыстәыла аекономикатә ҿиара Аминистрра иатәу Академиа жәларбжьаратәи азинқәа ркафедра апрофессор Анаит Сымбатиан. Лара аекономикатә зин жәларбжьаратәи аиҭакрақәеи Аҧсны ахәаахәҭра аҿиараҿы азинмчреи ирызкыз алекциа даҧхьеит. Дырзааҭгылеит Урыстәыла, Аҧсны, Китаи аҳәынҭқаррақәа рыҿиара, аамҭа ҿыц ицәырнаго азҵаатәқәа рыӡбаразы азнеишьақәа.

Аекономикеи апеадгогикеи, азини Волжсктәи аинститут аҭоурыхи азини ркафедра адоцент Ирина Апарина ллекциа адемографиатә ҭагылазаашьа  аиҭакрақәа рҟны ауаажәларра напхгараҭаратә мчра  ақәкы дазааҭгылеит. Иаалгеит Урыстәылеи Аҧсни еицырзеиҧшу аҿырҧштәқәа.

Москва амедиаҵарадырра азанааҭдырыҩцәа Реилазаара аиҳабы лхаҭыҧуаҩ, афилологиатә ҭҵаарадыррақәа ркандидат Светлана Камышева лықәгылара аҳәынҭқарратә напхгараҭара аусзуҩцәа реимадара иазкын. Инарҵаулан дырзааҭгылеит анапхгараҭаратә мчраҟны аус зуа  рзанааҭдырра аҩаӡара, рзанааҭтә етика, рцәажәара аҷыдарақәа уҳәа. Рыӡбахә лҳәеит адыррақәа реизырҳаразы ҳаамҭа иақәшәо азнеишьақәа.